بسم الله الرحمن الرحيم
السلام عليكم و رحمة الله و بركاته زوار زراعة بلكونة
صباح سعيد عليكم و يارب تكون ايامكم كلها بهجة و سعادة :)
حنتكلم النهاردة عن فاكهة الطماطم !!!
ايوة انت قريت صح فاكهة الطماطم حيث انها تنتمى الى فصيلة الباذنجان و من الممكن ان تنمو فى بعذ الاصناف حتى ثلاثة امتار فالطماطم تنتج من شجرة ، من زهرة الطماطم ، التي تُزرع عن طريق البذور في التربة ، و الثمار التي نحصل عليها من الأشجار تعد ( فاكهةُ ) ....
الطماطم من اسهل النباتات الى ممكن تزرعها فى بلكونتك او حديقتك او فوق سطح بيتك ..........
نبات طيب و متساهل مع كل الناس مبيحبش يزعل حد ينفع الصغير يزرعه قبل الكبير
1- اول خطوة انك تنقى من الثلاجة طمطماية صحيحة مستوية (مكتملة النضج)
 |
2 - تاخدها و تقطعها شرائح زى كدا
3 - تجيب قصرية زرع او اى علبة بلاستيك بس تكون مخرمة من تحت (لتصريف المياه الزائده ) و نحط فيها التربة بتاعتنا الى حتكون عبارة عن بيتموس و رمل (البيتموس ده تربة صناعية بتتباع فى المشاتل ) او ممكن ناخد تربة من اى جنينة فى الشارع .
بعد كده بنحط الشرائح الى قطعناها فوق ديه على وش التربة زى كده و محدش يقلق مش حتجيب حشرات ولا حاجة .
4 - بعد كده تغطى شرائح الطماطم ديه بشويه تراب
5- و الخطوة الاخيرة بنسقى الزرعة بتاعتنا بالماية
6 - كده احنا خلصنا لما نحس ان التربة نشفت نعاود الرى (لمعرفة جفاف التربة نقوم بادخال قلم رصاص او صابع اليد فى التربة على عمق بسيط من سطح التربة و اخراجه لو كان يوجد عليه تراب رطب فالتربة لم تجف و العكس صحيح )
7- بعد حوالى اسبوعين يبدا النبات بالنمو .فى هذه الفترة يجب تعريض النبات لضوء الشمس للحصول على نبات قوى
8- لما طول النبات يوصل لحوالى 10-15 سم بنفصل النباتات عن بعض و نخلى كل واحدة لوحدها فى : ( قصرية -كيس بلاستيك-علبة بوية......حسب المتوفر اهم حاجة تكون مخرومة من الاسفل )
اكيد بتسألوا ازاى حنعمل كده ؟؟؟
الموضوع بسيط قوى حنروى التربة كويس بالمايه بعد كده نشد الشتلات براحه حتخرج بالجذور بتاعتها نحطها فى الوعاء الجديد بتاعها و منسساش بعد لما نحط التراب عليها نضغط بباطن الكف على وش التربة للتاكد من عدم وجود فراغات هوائية بين الجذور ممكن تموت النبات . و نسقيها تانى رية غزيرة
9- النبات بتاعنا حيبدا يكبر و بعد حوالى شهرين ونصف حتبدا الزهور تظهر (الزهور الصفراء بتجف و تتحول الى ثمار الطماطم)
10- فى الفترة ديه حنقلل الرى شوية للحفاظ على نسبة عقد ثمار جيدة
11- بعد كده تتحول الزهور لثمار صغيره
نستى لغاية متحمر الطماطم بتاعتنا و نقطفها و بالهنا و الشفا
يا رب يكون الموضوع عجبكم و تكونوا استفدتوا منه
شكراااااااا😃😃😃
جميل جدا
ردحذفبس التربه طيب ليه التربه مش طمى ورمل
وهل لازم تسميد وماهو
وشكرا
مفيش مشكلة ممكن تكون طمي و رمل حسب المتوفر.لو في تسميد طبيعي يبقى افضل من الاسمدة الكيماوية . يعني مثلا ممكن اضافة الكمبوست لخليط التربة عند تشتيل و نقل النباتات لوعاء اكبر .
ردحذف